ARTICLE LXXVI.
En quoy elle peut nuire : Et comment on
peut suppleer à son defaut et
corriger son exces.

Mais il arrive bien plus souvent qu’on admire trop, et qu’on s’estonne, en apercevant des choses qui ne meritent que peu ou Le Gras, p. 103
Image haute résolution sur Gallica point d’estre considerées, que non pas qu’on admire trop peu. Et cela peut entierement oster ou pervertir l’usage de la raison. C’est pourquoy encore qu’il soit bon d’estre né avec quelque inclination à cette passion, pource que cela nous dispose à l’acquisition des sciences ; nous devons toutefois tascher par apres de nous delivrer le plus qu’il est possible. Car il est aysé de suppleer à son defaut par une reflexion et attention particuliere, à laquelle nostre volonté peut tousjours obliger nostre entendement, lors que nous jugeons que la chose qui se presente en vaut la peine. Mais il n’y a point d’autre remede pour s’empescher d’admirer avec exces, que d’acquerir la connoissance de plusieurs choses, et de s’exercer en la consideration de toutes celles qui peuvent sembler les plus rares et les plus estranges.