SVR LA PREMIERE MEDITATION.
Des choses qui peuuent estre reuoquées en doute.
OBIECTION PREMIERE.
Il paroist assez, par les choses qui ont esté dites dans cette Meditation, qu’il n’y a point de marque certaine et euidente, par laquelle nous puissions reconnoistre et distinguer nos songes de la veille, et d’vne vraye perception des sens ; et partant que les images des choses que nous sentons estant éueillez, ne sont point des accidens attachez à des objets exterieurs, et qu’elles ne sont point des preuues suffisantes pour monstrer que ces objets exterieurs existent en effect. C’est pourquoy Camusat – Le Petit, p. 221
Image haute résolution sur Gallica si sans nous aider d’aucun autre raisonnement, nous suiuons seulement nos sens, nous auons iuste sujet de douter si quelque chose existe, ou non. Nous reconnoissons donc la verité de cette Meditation. Mais d’autant que Platon a parlé de cette incertitude des choses sensibles, et plusieurs autres anciens Philosophes auant et aprés luy, et qu’il est aisé de remarquer la difficulté qu’il y a de discerner la veille du sommeil, i’eusse voulu que cét excellent auteur de nouuelles speculations se fust abstenu de publier des choses si vieilles.
Réponse.
Les raisons de douter qui sont icy receuës pour vrayes par ce Philosophe, n’ont esté proposées par moy que comme vray-semblables : Et ie m’en suis seruy, non pour les débiter comme nouuelles, mais en partie pour preparer les esprits des Lecteurs à considerer les choses intellectuelles, et les distinguer des corporelles, à quoy elles m’ont tousiours semblé tres-necessaires ; en partie pour y répondre dans les Meditations suiuantes, et en partie aussi pour faire voir combien les veritez que ie propose en suite sont fermes et assurées, puis qu’elles ne peuuent estre ébranlées par des doutes si generaux, et si extraordinaires. Et ce n’a point esté pour acquerir de AT IX-1, 134
la gloire que ie les ay raportées ; mais ie pense n’auoir pas esté moins obligé de les expliquer, qu’vn Medecin de décrire la maladie dont il a entrepris d’enseigner la cure.