Camusat – Le Petit, p. 399
Image haute résolution sur Gallica CONTRE LA PREMIERE MEDITATION.
Des choses qui peuuent estre reuoquées en doute.

Povr ce qui regarde la premiere Meditation il n’est pas besoin que ie m’y arreste beaucoup ; Car i’aprouue le dessein que vous auez pris de vous defaire de toutes sortes de prejugez. Il n’y a qu’vne chose que ie ne comprens pas bien, qui est de sçauoir pourquoy vous n’auez pas mieux aimé tout simplement, et en peu de paroles, tenir toutes les choses que vous auiez connües iusques alors pour incertaines, afin puis aprés de mettre à part celles que vous reconnoistriez estre vrayes, que les tenant toutes pour fausses, ne vous pas tant dépoüiller d’vn ancien preiugé, que vous reuétir d’vn autre tout nouueau. Et remarquez comme quoy il a esté necessaire pour obtenir cela de vous, de feindre vn Dieu trompeur, ou vn ie ne sçay quel mauuais genie qui employast toute son industrie à vous surprendre, bien qu’il semble que c’eust esté assez d’alleguer pour raison de vostre defiance le peu de lumiere de l’esprit humain, et la seule foiblesse de la nature. Outre cela vous feignez que vous dormez, afin que vous ayez occasion de reuoquer toutes choses en doute, et que vous puissiez prendre pour Camusat – Le Petit, p. 400
Image haute résolution sur Gallica des illusions tout ce qui se passe icy bas. Mais pouuez-vous pour cela assez sur vous-mesme, que de croire que vous ne soyez point éueillé, et que toutes les choses qui sont et se passent deuant vos yeux, soient fausses et trompeuses ? Quoy que vous en disiez, il n’y aura personne qui se persuade, que vous soyez pleinement persuadé qu’il n’y a rien de vray de tout ce que vous auez iamais connu ; et que le sens, ou le sommeil, ou Dieu, ou vn mauuais genie vous a continuellement imposé. N’eust-ce pas esté vne chose plus digne de la candeur d’vn Philosophe, et du zele de la verité, de dire les choses simplement, de bonne foy, et comme elles sont, que non pas, comme on vous pouroit objecter, recourir à cette machine, forger ces illusions, rechercher ces detours, et ces nouueautez ? Neantmoins puis que vous l’auez ainsi trouué bon, ie ne contesteray pas dauantage.