1. Postquam gens Francorum Christi gratia insignita longe lateque undique per provincias superborum colla perdomuisset, Childeberto, piissimo principe, monarchiam totius occidui et septentrionis necnon et meridiei partes strenue gubernante, quia omnipotens Deus non solum in omnibus gentibus, verum etiam in omnibus mundi partibus quem ipse fecit per subjectorum spirituum agmina principatur, beatus Michael archangelus, unus ex septem in conspectu Domini semper assistentibus, qui etiam et paradisi praepositus salvatorum animas in pacis regione collocaturus legitur, post eam manifestationem qua se in Monte Gargano ad adorandum ac glorificandum quomodo et qualiter voluit, sicut in scriptis habetur, ostendit, his, ut comprehensum est, per beatum archangelum patratis, illuminatis Christi gratia cunctis gentibus in orientalibus Romaniae partibus, accipe quibus sese indiciis manifestare idem beatissimus princeps supernorum civium voluerit praesulem occidentalium populorum, ut, qui quondam benedicto in Patriarchis populo Israhelitico defensionis attribuerat opem, ipse custos existeret ac praevius vocatis filiis per adoptionem.

2. Namque legitur in visione Danihelis prophetae dicente eidem angelo: « Nemo est adjutor meus in omnibus his nisi Michael archangelus princeps vester ». « Princeps », inquit, « vester », populi videlicet Judaeorum. Christo vero domino in propria veniente atque, a suis non recepto quin potius prodito, ipso ad Patrem remeante, dum aboletur observatio priscae legis, constabilitur adnuntiationis Evangelicae admirabile sacramentum, dum, exeunte per omnem terram sono apostolorum, caerimoniae transferuntur sacrorum per ministeria angelorum.